Film og kaffi går godt saman

Ein ny type arrangement har sett dagens lys i Samnanger - nemleg kulturhistorisk kafé. Sist laurdag fann svært mange vegen til Antons kulturhistoriske senter på Frøland. Dette var tydeleg eit populært tiltak blant samningar og andre som hadde møtt opp. Det er ikkje godt å vita kor mange som var innom i løpet av dei 3 timane som arrangementet varte, men truleg godt over 100.

Kaffi og lappar var ei populær salsvare, og det såg ut for at gjestane kosa seg både med kaffikoppen, lappane og dei mange inntrykk som dei fekk hjå Anton. Ulike filmsnuttar vart viste på det store lerretet i kaférommet til stor glede for gjestane våre.

 Bente Getz gjorde som vanleg lukke med osteprodukta sine; ho delte villig ut smaksprøvar til gjestane, og mange hadde nok med seg heimatt noko godt frå Bente sitt ostebord. Elin og Stein-Åge Liøen hadde baka lefser; mange fekk smaka og alt dei hadde med seg vart selt.

 Norvald Reistad trylla fram fine trekkspeltonar for oss og gjorde sitt til at dagen vart ekstra hyggeleg.

 Mange hadde nok ikkje sett verken den store samlinga til Anton eller fotoutstillinga frå kraftutbyggingsjubileet før, men på dette arrangementet fekk dei god tid til å studera alt innom veggane på gamleskulen på Frøland. Me trur at alle er samde om at er vorten ein stad å gleda seg over både for samningar og tilreisande.

Små og store ser på bildeutstillinga

Historielaget er godt nøgde med besøket og arrangementet, og det er ikkje heilt utenkjeleg at dette kan verta eit arrangement me kan ha fleire gongar.

Tusen takk til alle som gjorde sitt til at arrangementet vart vellukka. Ein spesiell takk til Anton og Siri Drønen for det gode samarbeidet med historielaget. Utan Anton, Siri og deira innsats i gamleskulen på Frøland hadde ikkje arrangementet fått det same innhaldet.

Magda Haugen

Kraftkarar i arbeid

Fotoutstillinga frå kraftutbygginga av Storelva (”Samnangervassdraget”), er no sett opp på Antons kulturhistoriske senter på Frøland. Her kan du i ro og mak sjå dei over 100 bileta frå utbyggingsstarten i 1909 til Svartavassdammen stod ferdig 20 år seinare.

Les meir om utstillinga her: “Samnangerkraft i 100 år - vellukka fotoutstilling“

Ikkje ofte me ser Kleivavatnet frå denne kanten!

Samnanger historielag sin lokalhistoriske tur sundag 23.08.09 vart ein suksess. Skiftande ver med trugande skyer hindra ikkje folk i å møta opp. Ca 65 personar hadde teke turen til Kleivabruane denne sundags føremiddagen for å vera med på ein guida tur kring Kleivavatnet og sidan biltur til Svartavatnet.

Svenn Arve Kleivane fortalde om den 100 år gamle kraftutbyggingshistoria i området. Han viste oss også spor i landskapet etter det omfattande arbeidet. Han viste oss og snakka om gamle teknikkar i anleggsarbeidet. Sjølv om terrenget var fuktig, fekk me ein fin og lett tur kring vatnet.

Mange var møtt opp for å gå "historisk tur"

Svenn Arve Kleivane og Helge Hisdal syner fram gamle boreteknikkar

Turen vidare til Svartavatnet var det også vel verd å få med seg. Vel framme ved Svartavatnet fekk me ein pust i bakken og me kosa oss med nista og kaffi. Tradisjonen tru serverte historielaget kringle. Etter ei litt uformell samkome, fortalde Svenn Arve Kleivane og Vidar Trengreid om anleggsarbeidet ved Svartavatnet både i eldre og nyare tider. Sistnemnde hadde mange historiar å formidla. I tillegg song han også ei rallarvise for oss.

Vidar Trengereid fortalde og song ved Svartavatnet

Alt i alt ein vellukka tur. Takk til alle som gjorde sitt til at denne turen vart minneverdig. Ein spesiell stor takk til Svenn Arve Kleivane og Vidar Trengreid for deira deltaking under turen. Og sist, men ikkje minst; ei stor takk til BKK for velvillig utlån av hytta ved Svartavatnet under arrangementet.

Magda Haugen

Foto: Britt Haukanes og Øyvind Røen

Tone T. Holmefjord

Nei, ho hadde ikkje konvolutt med snor i! Men spanande var det likevel då Tone T. Holmefjord avslørde kven som fekk midlane Historielaget sitt kulturhistoriske fond deler ut i 2009.

Den 13. juni var det opning av 100års-jubileet for kraftutbygginga på Frøland. Det var korpsmusikk og bratsjtonar og festleg stemning. Her vart det altså avslørd  kven som får  midlar frå historielaget sitt kulturhistoriske fond i 2009.

 Og dei heldige vart:

Ingmund og Jorunn Blom

 5 000 kr
 Grunngjeving for tildelinga:
Dei har gjort eit stort og flott arbeid med å restaurera den gamle løa på garden. Tildelinga er meint å vera ei oppmuntring for det arbeidet dei har gjort og kanskje inspirera dei til å halda fram med liknande oppgåver.

Antons kulturhistoriske senter v/ Anton Kåre Drønen
20 000 kr
Grunngjeving for tildelinga:
Antons kulturhistoriske senter er bygt opp til å verta Samnanger sitt naturlege sentrum for ivaretaking av lokal kulturhistorie. Me vonar at denne tildelinga av midlar kan vera med å gje prosjektet eit ytterlegare løft.

Dette sa altså styret for fondet, som er sett saman av Tone T. Holmefjord, Bjarne Hauge og Magda Haugen.

ME GRATULERAR!

Anton Kåre Drønen takkar for tildelinga

Det vert m.a. fortald om dei store endringane som det vesle bygdesamfunnet på Frøland og Totland gjekk igjennom, om privatskulen på Frøland der borna til “funksjonærane” på kraftverket gjekk og om nokon av dei som måtte flytta då utbygginga kom. Her er samla intervju med fleire som har vore med på anleggsarbeidet, ja til og med ein som var med heilt frå starten i 1909!  Boka har mange bilete frå utbygginga, ein del av dei same bileta som er omtala under “Samnangerkraft i 100 år - Vellukka fotoutstilling”.

Boka er laga med støtte frå BKK. Ho var til sals på Frøland jubileumsdagen 13. juni og seinare på dei vanlege stadene rundt i Samnanger: Kiwi, Spar, banken og Antons kulturhistoriske senter. Ho kan også tingast frå historielaget. Medlemer av historielaget, får boka tilsendt gratis.

Bergen byarkiv har lånt oss meir enn 100 bilete frå kraftubygginga. På biletet over, ser me tre kraftkarar som er med å få røyrgatene på plass på Frøland.

 

 

Laurdag 13. juni var det truleg 700-800 menneske på kraftstasjonen på Frøland i samband med jubileumskonserten med Wenche Myre.  Dei fleste av desse var også innom fotoutstillinga vår. Dette betyr at mange hundre menneske alt har sett utstillinga.  Til hausten vil me freista å få til ein eller fleire ekstra framsyningar av bileta. Dette vil bli gjort kjent her på heimesida og i Samningen.

Biletet er lånt ut av Bergenbyarkiv. Det viser bygginga av Tyssekaien i 1909. I robåten står ein dykkar med hjelm og det er sveivepumpe for trykkluft ombord.

 

 

 

 

I år er det 100 årsidan utbygginga av “Samnanger-vassdraget”  (Storelva) tok til. I samarbeid med BKK, laga historielaget til ei stor biletutstilling i kraftstasjonen på Frøland. Me har fått tilgang til unike bilete frå kraft-utbygginga. Ein fotograf følgde nemleg utbygginga heilt frå starten i 1909 og fram til utbygginga av Svartavatnet i 1923. Desse bileta låg lagra som negativar på glasplater. Bergen byarkiv har digitalisert denne biletskatten og historielaget har fått stilla dei ut.  Over 100 store bilete med kommentarar vart synte fram  i kraft-stasjonen på Frøland den 13.juni . Me vil som sagt prøva å få til  fleire framsyningar til hausten igjen. Første framsyning vert på Antons kulturhistoriske senter 23.-27. september.